Azərbaycanda İcra Hakimiyyətinin başçısı məhkəməyə müraciət etdi

Print Friendly, PDF & Email

Bakı Ağır Cinayətlər Məhkəməsi tərəfindən dələduzluqda təqsirləndirilən Teylor İbrahimovun (Teylor Fətişoğlu) cinayət işi üzrə prosesdə iştirak etməsi üçün Ağdam rayon İcra Hakimiyyətinin başçısı Raqub Məmmədova göndərilən çağırışa cavab verilib.

APA-nın xəbərinə görə, Məmmədov məhkəməyə məktubla müraciət edib. O, dələduzluqda təqsirləndirilən Teylor Fətişoğlunun cinayət işi üzrə şahid qismində istintaqa verdiyi ifadəsini təsdiq edərək, məhkəmədə ifadə vermək istəmədiyini qeyd edib.

Qeyd edək ki, T. İbrahimov R. Məmmədovun məhkəməyə çağırılması üçün bir neçə dəfə vəsatət qaldırıb. O, ittiham olunduğu dələduzluq əməlində vasitəçi olduğunu iddia edib.

Xatırladaq ki, T. İbrahimov zərərçəkmiş Cəfər Həşimovu Ağdamda yerləşən məktəblərdən birinə direktor təyin edəcəyini deyərək, onun 15 500 manatını dələduzluq yolu ilə ələ keçirməkdə təqsirli bilinir. Digər zərərçəkmiş Zaur Məmmədova isə Azərbaycan Dövlət Neft Şirkətinə (SOCAR) işə düzəldəcəyini deyərək, onun 13 min manat pulunu ələ keçirib.

20-dən çox zərərçəkmişə qarşı ümumilikdə 100 min manatdan çox ziyan vurmaqda təqsirləndirilən şəxsə qarşı Cinayət Məcəlləsinin 178.3.2 (dələduzluq; külli miqdarda törədildikdə) maddəsi ilə cinayət işi açılıb.

İbrahimov eks-prezident Ayaz Mütəllibovun Moskvada mətbuat katibi olub.

...