400 min dollarlıq toyun keçirildiyi şadlıq sarayından şok qiymətlər – Araşdırma

Print Friendly, PDF & Email

Böyük Saray”da birnəfərlik menyunun minimal qiyməti 220 AZN-dir… maksimum isə…

Bakı Lift İdarəsinin baş direktoru Qüdrət Şükürovun qızı Aysel Şükürova toy mərasiminin 400 min dollara başa gəlməsi barədə yayılan xəbərlərə mediada aydınlıq gətirib.

Toylarının Bakıda yerləşən “Böyük Saray” şadlıq evində olduğunu deyən Aysel bildirib ki, bütün xərcləri yoldaşı və onun ailəsi çəkib.

Musavat.com isə kiçik bir araşdırma ilə həmin şadlıq sarayındakı qiymətlər və detallarla maraqlanıb. Şadlıq sarayından əməkdaşımıza bildirildi ki, burada 3 cür menyu var və onların da fərqli qiymətləri var. Adambaşına bir nəfərlik masanın minimal qiyməti 220 manatdan başlanır. Digər menyulara keçək: 250 və 300 manatlıq.

Şadlıq saraylarındakı zallar böyük həcmli olduğu üçün ora 400 nəfərdən aşağı qonaq qəbul edilmir. “Böyük Saray”dan öyrəndik ki, qonaqlar daha çox 800 nəfərlik orta zalı tərcih edirlər. Amma ikinci mərtəbədə yerləşən 1620 nəfərlik zal da toy və iri mərasimlər üçün nəzərdə tutulub.

İndi gəlin elementar hesablama aparaq. Hesab edək ki, toya 400 nəfər çağırılıb və ən “ucuz” menyu olan 220 manatlıq menyu seçilib. Bu, ev sahibinə 88.000 manata başa gəlir. Yox, əgər, menyu 250 manat, qonaqların sayı isə 800 nəfərdirsə, bu, 200.000 manatlıq xərc deməkdir. Ən maksimal həddi də hesablayaq. 300 manatlıq menyu və 1620 nəfər qonaq. Bu halda da toy sahibi şadlıq sarayına 486.000 manat ödəməlidir. Yəni, təxminən yarım milyona yaxın vəsait…

Orta statistik azərbaycanlının ağlına gələn ən birinci sual isə 220 manatlıq menyuda qonaqlara nə təqdim olunmasıdır. Şadlıq sarayından bildirdilər ki, onlar çoxluq yox, keyfiyyət prinsipinə önəm verirlər. Qonaqlarına daha çox brend içkilər, bahalı qəlyanaltılar təqdim edirlər. Bundan başqa, menyuların arasındakı qiymət fərqi həm də də içkilərin sayı, keyfiyyəti ilə bağlıdır.

Daha bir məqam isə ondan ibarətdir ki, sözügedən qiymətlərə nə müğənni, nə də fotosessiya xərcləri daxildir. Yəni, şadlıq sarayı qonaqlara və ev sahibinə ekstra hansısa xidmət təklif etmir. Bunun üçün toy sahibi əlavə pul ödəməlidir. Bu halda toyun 400 min dollara başa gəlməsi ilə bağlı deyilənlər də inandırıcıdır. Sıradan müğənnilərin belə fonoqramla yarım saat çıxış üçün 5000 manat tələb etdiyini nəzərə alanda… bunun müğənni, gəlinlik, maşın, fotosessiya…və ağlınıza gələcək-gəlməyəcək minlərlə əlavə xərcini də hesaba qatıb, yazılanların fantaziya olmadığı qənaətinə vara bilərik.

...