Osakücə kəndində yeni çay plantasiyası salınır (FOTO)
Azərbaycan Respublikasının Prezidenti cənab İlham Əliyevin sədrliyi ilə cari ilin sentyabr ayında Lənkəranda keçirilmiş çay, çəltik və sitrus meyvə istehsalı məsələlərinə dair respublika müşavirəsində çayçılığın inkişafı ilə bağlı qarşıya mühüm vəzifələr qoyulub. Bu vəzifələrin icrasından ötrü həyata keçirilən işlər artıq geniş vüsət alıb. Rayonda sahibkarlığın inkişafı üçün yaradılan əlverişli şərait aqrar bölmənin aparıcı istiqamətlərindən olan çayçılığa hətta xarici investisiyanın təşviqini də sürətləndirib. Nəticədə çayçılıq sahəsində əsil canlanma yaranıb. Beta şirkəti tərəfindən rayonun Osakücə kəndində yeni çay plantasiyasının salınmasına başlanılıb. Şirkət tərəfindən bu layihənin icrasına 17 milyon manat vəsaitin sərf olunacağı nəzərdə tutulub. Artıq bu vəsaitin 5 milyon manatı təsərrüfata yatırılıb. Bu məqsədlə şirkət tərəfindən təsərrüfat üçün ən müasir tələblərə cavab verən maşın-mexanizmlər, traktorlar alınıb, yeni texnologiya ilə işləyən suvarva sistemi qurulub, sututar stil bərpa edilib, ərazidə şitillik təsərrüfatı yaradılıb və 1 milyona qədər yerli şəraitə uyğun çay şitili yetişdirilib. Eyni zamanda ilkin olaraq 50 hektar istifadəsiz torpaq sahəsi hamarlanaraq şumlanıb və əkinə hazır vəziyyətə gətirilib. Oktyabrın 31-də yeni salınmış və 150 nərdən çox yerli sakinin daimi işə cəlb olunduğu plantasiyada ilk əkin keçirilib. Bayram əhval-ruhiyyəsi ilə keçən əkin mərasimində Lənkəran ŞİH başçısı Taleh Qaraşov, Beta şirkətinin rəhbəri Calal Uğur, keçmiş təsərrüfat rəhbərləri, çay mütəxəssisləri, ictimaiyyət və KİV nümayəndələri iştirak ediblər.
2018-ci ildə ərazidə çay plantasiyalarının həcmi 150 hektara, yaxın gələcəkdə isə 1000 hektara çatdırılacağı və “Made in Azerbaycan” brendi ilə dünya standartları səviyyəsində çay məhsulları istehsal etməkdən ötrü modern texnologiya ilə işləyəcək yeni çay emalı fabrikinin tikiləcəyi nəzərdə tutulub.
