Ərəblər daha bir məşhur Avropa klubunu alır – 365 milyon dollar
Uzun müddətdi satılacağı deyilən “Nyukasl”ın yeni sahibi müəyyənləşmək üzrədi.
Fanat.Az xəbər verir ki, Səudiyyə Ərəbistanından olan iş adamı Yasir Əl-Rumayyanın İngiltərənin Premyer Liqa klubunu almağa hazırlaşdığı bildirilir. Satışın qısa müddətdə tamamlanması gözlənilir.
“Forbes”in məlumatına görə, klubun səhmlərinin 80-ni hazırkı sahibi Mayk Eşlidən alacağı deyilən Əl-Rumayyan bunun üçün 365 milyon dollar ödəyəcək. Xəbərdə həmçinin bildirilir ki, satış tamamdan sonra ərəb iş adamı klubun prezidenti olacaq.
“Forbes”in ən dəyərli klublar siyahısında 318 milyon dollarla 20-ci pillədə yer alan “Nyukasl” uzun müddətdi uğursuz çıxış edir və Premyer Liqada qalmağa çalışır.
Yasir Əl-Rumayyanın klubu aldıqdan sonra köklü dəyişiklər edəcəyi, baş məşqçi postuna məşhur mütəxəssislərdən birini gətirəcəyi deyilir. Bu posta ən real namizədin Massimiliano Alleqri olduğu bildirilir. 2018/19 mövsümünün sonunda “Yuventus”dan ayrılan italyan mütəxəssis o vaxtdan heç bir klubu çalışdırmayıb.
Qeyd edək ki, bundan əvvəl amerikalı veteran boksçu Floyd Meyvezerin də “Nyukasl”ı satın almaq istədiyi bildirilirdi. Hətta Meyvezer özü də açıqlamasında bunu təsdiqləmişdi.