Ekologiya və Təbii Sərvətlər Nazirliyindən Lerik meşələrindəki kütləvi qırıntılara görə göndərilən yoxlamalar müəmmalı səbəbdən dayanıb.
Bu barədə sakinlər AzToday.az-a məlumat veriblər. Onların sözlərinə görə, Bakıdan gələn yoxlama dünən “işi”ni yekunlaşdırıb. Belə ki, Razvonaband meşəbəyliyinin 22 saylı dolayında kütləvi qırıntılar olsa da, yoxlama cəmi 20-30 agacı qeydə alıb.
Yoxlama qırıntıların 5-6 ay əvvəl baş verməsi formasında rəsmiləşdirməyə çalışır. Halbuki qırıntılar maksimum 2-3 ayda edilib. Hətta 1-2 həftə əvvəl kəsilən agacların görüntüləri var.
Meşə mafiyası bütün məsuliyyəti 2021-ci ilin dekabr ayında işdən çıxarılmış meşə gözətçisi Fuad Hümmətovun üzərinə qoymaq istəyir. Muxtar Babayevin Bakıdan göndərdiyi yoxlama da işini bu fonda yekunlaşdırmaq istəyir.
Qeyd edək ki, 22-ci dolayla yanaşı Razvonaband meşəbəyliyinin 16, 17 və 18-ci meşə dolaylarında da kütləvi qırıntılar var. Və nazirlikdən göndərilən nümayəndə sözügedən dolayları isə yoxlamaq fikrində deyil. Görünür, meşələri qıran ekologiya işçiləri Bakıdan gələn həmkarlarını əməlli başlı “razı” sala biliblər…
