Çin yeni rəsmi xəritələrdə Rusiyanın bir hissəsini öz ərazisi kimi göstərib
Çinin dövlətə məxsus “Standart xəritələrin kartoqrafiya xidməti” 2023-cü il üçün Rusiya ərazilərinin bir parçasının Çinin bir hissəsi kimi çəkilən yeni, rəsmi təsdiq edilmiş coğrafi xəritələr toplusunu buraxıb.
“Report” xəbər verir ki, bu barədə RBC məlumat yayıb.
Söhbət Amur çayı üzərində yerləşən, Rusiya və Çin arasında 2008-ci ildə bağlanmış müqavilə əsasında bölünmüş Bolşoy Ussuriyski adasından gedir. Dərc edilmiş xəritədə ada ayrıca ölkənin ən şərq nöqtəsi kimi qeyd olunub.
“Standart xəritə Çinin və dünyanın digər ölkələrinin sərhədlərinin dizaynı üçün milli standartlara uyğun tərtib edilib”, -xidmət açıqlayıb.
Yeni rəsmi xəritələr dəsti xəbərlərdə, kitablarda, reklam materiallarında illüstrasiya kimi istifadə üçün nəzərdə tutulub. Onlar həmçinin istinad üçün əsas xəritəsi kimi istifadə edilə bilər.
