“Nəticə ortadadır, çünki Rusiya yalnız bu dildən anlayır” (ŞƏRH)
“Möhtəşəm Zəfər Paradında Azərbaycan-Türkiyə birliyi nümayiş olundu. Səhnələşdirilmiş paradda nümayiş olunanlarla Rus əzələ nümayişinə əzələ ilə cavab verildi”.
Qaynarinfo xəbər verir ki, bu sözləri politoloq Natiq Miri Rusiya ilə Azərbaycan arasında yaşanan son hadisələri şərh edərkən bildirib. Onun sözlərinə görə, Azərbaycan ordusunun Qarabağda həyata keçirdiyi son əməliyyatlar Rusiyanın geri çəkilməsini şərtləndirib:
“İlk olaraq Zəfər Paradı öncəsi Rusiya Azərbaycandakı emissarları vasitəsilə “Türkiyəni Azərbaycanda – Qarabağda istəmirik” deyə niyyətini bəyan etdi. Sonra sözdən əməli fəaliyyətə keçərək Azərbaycandan pomidorların idxalına qadağa qoydu. Bu hadisədən sonra artıq bəlli idi ki, Rusiya bununla yetinməyəcək və ənənəvi olaraq əzələ nümayiş etdirəcək. Və Xocavəndin Hadrut qəsəbəsinin 2 kəndində erməni yaraqlıları Azərbaycan əsgərinə hücum etdi, bir neçə əsgərimizi şəhid etdi, yaraladı. Ardınca rus “sülhməramlılarının” fəaliyyət məkanı artırıldı və bu, yeni xəritədə təsbit olundu. Bu hadisələr ardıcıllığının pik nöqtəsi Rusiya “sülhməramlılarının” komandanı Rüstəm Muradovun Xankəndində terrorçubaşı Arayik Arutyunyanla qardaşcasına qucaqlaşması oldu.
Mesaj Azərbaycan tərəfindən alındı və ardınca nə baş verdi?
Möhtəşəm Zəfər Paradında Azərbaycan-Türkiyə birliyi nümayiş olundu. Səhnələşdirilmiş paradda nümayiş olunanlarla Rus əzələ nümayişinə əzələ ilə cavab verildi. Ardınca Azərbaycan Hadrutun 2 kəndində antiterror əməliyyatı keçirməklə, gücə güclə cavab verdi. Və Azərbaycan əsgəri Qaladərəsi ətrafında 100-dən çox erməni terrorçusunu tərksilah etməklə, Rusiyanın istədiyi kimi hər şeyin “oldu-bitdi” ilə başa çatacağına imkan verilməyəcəyi ilə bağlı Azərbaycanın dövlət iradəsini ortaya qoydu. Və təbii ki, bu prosesdə hakimiyyət yenidən ictimai rəyə ehtiyac duydu və bu dəstəyi arxasına alaraq Rusiyaya qarşı özünü daha güclü tərəfdən nümayiş etdirdi.
Nəticə o oldu ki, işğala qədər mövcud olan sərhədlərimizdən ard-arda erməni ordusu çıxmağa başladı. Rus “sülhməramlılarının” Qarabağa gəlişindən sonra Azərbaycan əsgərinin nəzarətində olan ərazilərə qayıdan ermənilər yenidən o əraziləri tərk etməyə başladılar. Şuşa və Laçına açılan bir çox strateji yollar Azərbaycan əsgəri tərəfindən nəzarətə götürüldü. Laçının ən yüksək nöqtəsində Azərbaycan bayrağı qaldırıldı. Rusiya Azərbaycandan idxal etdiyi pomidorlara qoyduğu qadağanı ləğv etdi. Və ən nəhayət Xankəndində qondarma “DQR” rejiminin inzibatı binasının başında və önündə “bayraq” olaraq yellənən cındır erməni əskiləri endirildi.
Baş verənlərlə Rusiya Azərbaycana hansı mesajı vermək istəyirdi?
Rusiya bununla regionda kimin söz sahibi olduğunu, general Muradovun terrorçubaşı ilə isti görüşməsi ilə də erməni köpəkləri vasitəsilə hər an Qarabağ yarasını qanada biləcəklərini nümayiş etdirdi. Azərbaycan da Rusiyanın bu gedişinə Türkiyə-Azərbaycan birliyi, antirusiya ictimai rəyi və Azərbaycan əsgərinin dəmir yumruğu ilə cavab verdi. Nəticə isə ortadadır, çünki Rusiya yalnız bu dildən anlayır. Ortada bir Suriya, Liviya, Qarabağ təcrübəsi var”.
