140 minlik printer, 200 minlik hasar və yaşıllıq… – İnam Kərimova sərt sual: “Niyə belə baha?”
Siyasi fəal Bəxtiyar Hacıyev kənd təsərrüfatı naziri İnam Kərimova suallar ünvanlayıb.
AzToday.az xəbər verir ki, B.Hacıyev bəzi məsələlərə aydınlıq gətirilməsini istəyir. O, bildirib ki, “Aqrar Tədarük və Təchizat” ASC 138738.5 manatlıq printer kartrici alıb:
“Hörmətli İnam Kərimov, Kənd Təsərrüfatı Nazirliyinin tabeliyində olan “Aqrar Tədarük və Təchizat” ASC ayrıca mətbəə açmayıbsa və sirr deyilsə, neçə printer üçün hansı model və neçə ədəd kartric alındığını öyrənmək imkanımız varmı?
Bir də mümkün olsa, 12 nəfərin işlədiyi yazılan Cəlilabad Bölgə Təcrübə Stansiyasında söküntü işləri üçün 95.314 manat, hasar çəkilməsi və yaşıllıq üçün 189.769 AZN-lik tenderlər barədə də məlumat ala bilərikmi? 12 nəfərin oturduğu 2 mərtəbəli binanı tam söküb, yenidən tikmək heç 285 min manat tutmaz, söküb hasarlamaq niyə belə baha çıxıb?”.
