Sumqayıt RETSİ-nin istismar üzrə mühəndisi nazirdən kömək istəyir
Sumqayıt RETSİ-nin istismar üzrə mühəndisi Quliyev Anar Ələmqulu oğlu energetika naziri Pərviz Şahbazova və “Azərişıq” ASC-nin sədri Vüqar Əhmədova müraciət edib.
O, qurumdakı özbaşınalıqlardan və qanunsuzluqlardan şikayət edib, həmçinin nazirdən və ASC rəhbərindən kömək istəyib.
Bu barədə mühəndis “Arqument.az”a göndərdiyi müraciətdə qeyd edir.
“”Azərişıq” ASC sədri cənab Vüqar Əhmədovun göstərişlərinə məhəl qoymadan, qanuna zidd hərəkətləri ilə qurumun nüfuzuna xələl gətirən “Azərişıq” ASC məmurları barəsində tədbir görülməsi üçün sizlərdən kömək istəyirəm”, – deyə o qeyd edib.
Şikayətçi yazır ki, Sumqayıt şəhər 4-cü mikrorayon ərazisində yerləşən obyektin şəbəkəyə qoşulması üçün ASAN xidmətə ödənilməli olan rüsumun məbləği 27.500 AZN-dir.
Obyekt sahibi bu rüsumu ödəməyə hazırdır. Lakin “Azərişıq” ASC-nin Texniki Nəzarət İdarəsinin rəisi Arif Məmmədov “süründürməçilik siyasəti”ni işə salaraq “Azərişıq” ASC-nin xeyrinə olan bu işə qəsdən maneçilik edir.
Onun sözlərinə görə, abonent qeyd olunan məbləği ASAN Xidmətə ödəmək üçün Arif Məmmədov rəy verməlidir: “Amma Məmmədov obyektin transformator məntəqəsinin mühafizə zonasında yerləşdiyini bəhanə edərək “Azərişıq” ASC-nin xeyrinə olan bu məsələyə məqsədli şəkildə maneçilik edir. Şəbəkəyə qoşulmaq istəyən obyektin arxa divarı ilə 59 saylı Transformator məntəqəsinin arxa divarı arasındakı məsafə 60 sm-dir. Obyektin və Transformator Məntəqəsinin arxa divarlarında nəinki qapı nəfəslik belə yoxdur, təmamilə qapalıdır. “ASAN” və 13-cü xidmətin fəaliyyətinə V.Əhmədov tərəfindən xüsusi önəm verilir”.
Anar Quliyev yazır ki, texniki nəzarət idarəsinin rəisi A.Məmmədov bütün bunları bilə-bilə həm sahibkarı süründürməçiliyə salmaqla qurumun nüfuzuna zərbə vurur: “Bununla bağlı Arif Məmmədovun mobil nömrəsinə zəng edərək onun bu hərəkətinin “Azərişıq” ASC-nin mənafeyinə həm də qanuna zidd olduğunu bildirmişəm. Telefon danışığımız zamanı bu məsələni müsbət həll edəcəyinə dair mənə kişi kimi söz verdi, sonra nömrəmi blokladı və “Qurbanəli bəy” kimi “qaçıb gizləndi””.
“Məlumata görə, A.Məmmədovun rəhbəri olduğu Texniki Nəzarət İdarəsi yüksək gərginlikli hava xətlərinin altında tikilən kommersiya obyektlərindən 5000-7000 AZN rüşvət alıb rəy yazırlar. Sözügedən obyektdən də 3000 manat “şirinlik” istəyiblər. Belə çıxır ki, bunlar “Azərişıq” ASC-nin mənafeyini pula satırlar. Bu idarə özünə aid işlə məşul deyil. Bunlar üçün öz mənafeləri qurumun mənafeyindən üstündür. Bunların işi yarımstansiyalara, transformator məntəqələrinə nəzarət etməkdir. Öz işlərini yerinə yetirmirlər, yetirməsinlər heç olmasa qeyri-qanuni hərəkətlərilə “Azərişıq” ASC-ni nüfuzdan salmasınlar. 3000 manata görə “Azərişıq ASC-ni 27.500 manat ziyana salan bu idarə kimə gərəkdir?! Əminəm ki, cənab Vüqar Əhmədov bunlardan xəbərsizdir”, – deyə o bildirib.
Sumqayıt RETSİ-nin istismar üzrə mühəndisi nazirdən və ASC sədrindən “Azərişıq” ASC-nin mənafeyini düşünmədən, qurumun nüfuzuna xələl gətirən Texniki Nəzarət İdarəsinin rəisi Arif Məmmədovun “süründürməçilik siyasəti”nə son qoyulmasını xahiş edir.
