Gənclər və idman naziri kim olacaq? – Adil Əliyev, yoxsa Ülvi Quliyev?..

by Aztoday Xəbər Portalı

Gənclər və idman naziri kimin təyin ediləcəyi əsas müzakirə mövzularındandır.

Pravda.az-ın xəbərinə görə, adı hallanan deputatlar Milli Məclisin sədr müavini, parlamentin Gənclər və idman komitəsinin sədri Adil Əliyev, komitənin üzvü Ülvi Quliyevdir.

A.Əliyev uzun illərdir, gənclər siyasəti ilə məşğuldur. O, gənclərin zərərli vərdişlərdən uzaq durmaları üçün onların asudə vaxtlarının səmərəli təşkili ilə bağlı müxtəlif layihələr həyata keçirib. Bu illər ərzində idman yarışlarının təşkili xüsusi yer tutub.

Adil Əliyev 2000-2020-ci illər ərzində Kikboksinq Federasiyasına rəhbərlik edib. Nazir vəzifəsinə şanslı namizədlərdən hesab olunur. Bir neçə il əvvəl bu məsələ gündəmə gələndə, A.Əliyev bildirmişdi ki, belə bir fikri yoxdur. O, “İdman sahəsində aktivlik göstərirsiniz. Gənclər və idman naziri olmaq istəmisinizmi? Hətta bir müddət öncə bununla bağlı xəbər də yayılmışdı…” sualına belə cavab vermişdi: “Azərbaycanda belə şeylər qəbul olunmur. Yəni, hər kəs öz yerindədir. Nazir vəzifəsinə təyin olunanlar daha fəal, aktivdirlər. Onların iş rejiminə baxıram, çox çətindir, ona görə də istəmirəm. Əvvəllər bəlkə də düşünərdim, amma indi mümkün deyil. Vəzifədə olanların gecəsi-gündüzü yoxdur. Azad Rəhimov dostumdur, çox yaxşı insandır”.

Bu açıqlamanı verərkən Adil Əliyev parlamentin Gənclər və idman komitəsinin sədr müavini idi. Hazırda isə Milli Məclisin sədr müavini və adıçəkilən komitənin sədridir. Onun icra etdiyi iş kifayət qədər ağır və məsuliyyətlidir. Elə nazir vəzifəsi qədər…

Ülvi Quliyevin də şanslı namizədlərdən olduğu bildirilir.

O, parlamentin Gənclər və idman komitəsinin sədri olub. Gənclər siyasətinin həyata keçirilməsi istiqamətində kifayət qədər aktivlik göstərib. Ülvi Quliyev Azərbaycan Karate-do Federasiyaları Assosiasiyasının prezidentidir.

Digər namizəd isə gənclər və idman nazirinin müavini Fərhad Hacıyevdir.

O, 2000-2001-ci illərdə Azərbaycan Respublikası Gənclər Təşkilatları Milli Şurasının şöbə müdiri, məclis sədri, baş katibi vəzifələrində işləyib. 2001-ci ildə Azərbaycan Respublikası Gənclər, İdman və Turizm Nazirliyində bölmə müdiri vəzifəsində, 2002-2011-ci illərdə bölmə müdiri vəzifəsində çalışıb. 2011-2018 – ci illərdə Azərbaycan Respublikası Prezidenti yanında Gənclər Fondunun icraçı direktoru vəzifəsində işləyib. 2018-ci ildə Azərbaycan Respublikası Prezidentinin Sərəncamı ilə Azərbaycan Respublikası gənclər və idman nazirinin müavini vəzifəsinə təyin edilib.

Gənclər Fondunun icraçı direktoru Fərid Cəfərovun da bu vəzifəyə təyin ediləcəyi ilə bağlı hallanır.

O, ardıcıl olaraq Azərbaycanın BMT yanında Daimi Nümayəndəliyində attaşe, III katib və II katib, BMT-nin İnkişaf Proqramı (UNDP) və BMT-nin Əhali Fondunun (UNFPA) İcraiyyə Şurası bürosunda vitse-prezident, XİN-də II katib vəzifələrini tutub. Bu vəzifəyə qədər iş yeri isə Nəqliyyat, Rabitə və Yüksək Texnologiyalar Nazirliyində Beynəlxalq Əməkdaşlıq şöbəsinin rəisi vəzifəsi olub.

Nazirliklə bağlı struktur dəyişikliyinin həyata keçirilməsi də istisna edilmir.

Xatırlatma: Gənclər və idman naziri Azad Rəhimov aprelin 30-da vəfat edib. Mərhumun cənazəsi II Fəxri xiyabanda torpağa tapşırılıb.

Bənzər Yazılar