Azərbaycan Dövlət Sərhəd Xidməti dünən və bu gün Laçın rayonu ilə Ermənistanın Sünik (Zəngəzur) vilayəti sərhəddində vəziyyət barədə bəyanat verməyib. Turan-ın Dövlət Sərhəd Xidmətinin saytında göstərilən telefonlara zəng etmək cəhdləri uğursuz olub.
Xatırladaq ki, mayın 12-də axşamdan keçmiş Ermənistan hökumətinin başçısı Nikol Paşinyan Təhlükəsizlik Şurasını çağırıb və bildirib ki, mayın 12-də Azərbaycan Silahlı Qüvvələri Ermənistanın dövlət sərhəddini keçərək 3,5 kilometr dərinliyə yerləşiblər. Bu, Ermənistan ərazisinə qəsddir. Paşinyan deyib ki, Ermənistan Silahlı Qüvvələri lazımi tədbirləri görüblər, azərbaycanlılar silah işlətməyiblər, ancaq öz hərəkətlərini xəritələrlə əsaslandırmağa çalışırlar və bildirirlər ki, bura onların ərazisidir. O deyib ki, Yerevan məsələni danışıqlar yolu ilə həll edəcək.
Mayın 13-də mübahisəli Sevliç gölü (Qaragöl) ərazisində hər iki tərəfin hərbçiləri arasında danışıqlar aparılır. Gorus merinin müavini Menua Ovsepyanın sözlərinə görə, göl Sevliç Azərbaycan qüvvələrinin nəzarəti altında qalır və danışıqlar nəticə verməyib.
Mayın 13-də hökumətin səhər iclasında baş nazir Nikol Paşinyan da nəticənin olmadığını bildirib. Onun sözlərinə görə, qarşıdurma hərbi eskalasiyaya keçməyib, atışma və toqquşma yoxdur. O, Azərbaycan tərəfinin hərəkətlərini “öncədən planlaşdırılmış təxribat” adlandırıb.
