“Mahir Abbaszadə istefa verməlidir” – “Belə deputatlarımızın varlığından utanıram”

“Hazırda Parlamentdə 120 deputat var. Təəssüflə qeyd etməliyəm ki, bu deputatların ən azı 110-u oturduğu kreslonun məsuliyyətini dərk etmir, millət vəkili anlayışının nə demək olduğunu anlamır. Hələ də orda bu vəzifənin dövlətdə, icmaiyyətdəki yükünü anlamayanlar oturub”.

Bu fikirləri Demokrat.az-a Ağ Partiya sədri Tural Abbaslı deputat Mahir Abbaszadənin Laçında – şəhidin adını daşıyan bulağın yanında spirtli içki qəbul etməsi ilə bağlı yayılan xəbərlərə münasibət bildirərkən deyib:

“Onların çoxu alverçidir, fərqli işlərlə məşğul olurlar və belə adamlar deputat olub Parlamentdə oturublar. Düzü, indiyə qədər Mahir Abbaszadənin adını neçə dəfə eşitmişəm, xatırlamıram. 120 nəfərin arasında bu adamın adını eşitməmişiksə, ona necə deputat demək olar? Onlara da deputat deyək, istiqlalımıza səs verənlərə də? Bu hərəkətlər millət vəkili ifadəsini, anlayışını aşağı salır”.

Partiya sədrinin sözlərinə görə, deputat bu addımı ilə həm də milli-mənəvi dəyərlərimizə zərər vurur:

“Biz müharibədən yeni çıxmış ölkəyik, Mahir Abbaszadə də Laçının deputatıdır. Laçının və digər işğalda olan ərazilərimizin azad edilməsi üçün üç minə qədər şəhid vermişik. Şəhid sözü hüquqidən çox dini termindir. Bizim hələ də gözüyaşlı analarımız var. Bunları nəzərə almamaq, şəhidin adını daşıyan bulağın yanında spirtli içki içmək – hamımız üçün həssas məsələdə anlayış göstərməməkdir. Düşünürəm ki, sözügedən şəxs üzr istəməlidir. Düzü, məsuliyyətini az da olsa dərk etsəydi, tutduğu vəzifədən istefa verərdi, verməli idi. İllər əvvəl doğma yurdlarından didərgin düşmüş məcburi köçkünlərin təmsilçisi kimi vəzifəsindən getməli idi. Amma onlarda istefa mədəniyyətinin olmadığını nəzərə alaraq, düşünürəm ki, üzr istəməli, bir də belə səhvlər etməyəcəyi ilə bağlı bəyanat verərək insanların güvənini qazanmağa çalışmalıdır. Belə deputatlarımızın varlığından utanıram.

İşğaldan azad olunmuş torpaqlarımıza səfərlər çərçivəsində biz də Ağdama səfər etdik. Bir neçə partiya sədri ilə birlikdə orda zöhr namazı qıldıq. Aramızdan biri torpağı öpür, digəri nəzir verirdi. Bizim milli dəyərlərimizdə qələbəni, sevinci spirtli içki ilə qeyd etmək yoxdur, xüsusilə də şəhidin adı olduğu məqamda. Bu hərəkəti qınayıram, digər deputatlardan, özünü deputat hesab edənlərdən bu məsələlərdə daha diqqətli davranmağı tələb edirəm”.