Açıqlanan rəsmi rəqəmlərə görə Türkiyədə 7,5 milyon insanın narkotik sektorundan pul qazanaraq dolanışığını çıxardığı ortaya çıxır…
Sedat Pekerin narkotik ticarəti və Uğur Mumcunun öldürülməsi ilə bağlı ittihamlar irəli sürdüyü saatlarda Təhlükəsizlik Müdirliyi Narkotik Cinayətlərə Qarşı Mübarizə İdarəsi narkotikə qarşı mübarizə ilə bağlı rəqəmləri paylaşıb. Açıqlama rəqəmlərdən ibarətdir, ancaq onları şərh etdikdə əsl həqiqətlər ortaya çıxır.
Açıqlamaya görə, 15 iyul 2016-cı ildən bəri müdaxilə edilən narkotik hadisələrində 55%, tutulan şübhəlilərin sayında isə 44% artım müşahidə edilib. Açıqlamada: “Müdaxilə edilən hadisə sayı 15 sentyabr 2011-15 iyul 2016 tarixləri arasında 441.151, 15 iyul 2016-15 may 2021 arasında isə 682.779 olub. Müdaxilə edilən hadisələrin sayında 55% artım olub. Həbs olunan şübhəli sayı 15 sentyabr 2011-15 iyul 2016 tarixləri arasında 677.995, 15 iyul 2016-15 may 2021 arasında isə 974.583 nəfər olub. Tutulan şübhəlilərin sayında 44% artım olub”.
Bu açıqlamaya görə, şübhəlilərin bəzilərinin yenidən tutulduğunu nəzərə alsaq, son 10 ildə narkotik sektorunda təxminən 1,5 milyon insanın çalışdığını demək olar.
Yəni bu 1,5 milyon insan ailələri ilə birgə hesablansa, təxminən 7,5 milyon insandan söhbət gedir. Türkiyədə 7,5 milyon insanın narkotik sektorundan pul qazandığı ortaya çıxır. Yaxşı pul qazandıqları üçün bu təbəqənin iqtisadi, sosial və siyasi həyata təsir etmək gücünə də sahib olduğu göz qabağındadır.
Bu təsbiti etmək üçün başqa bir dəlilə ehtiyac varmı?
Məqalə rəqəmlərlə boğulmamalıdır, amma qısa bir sitat da gətirim:
“Ələ keçirilən marixuana miqdarında 25%, çətənə köklərində də 9% azalma olub. Heroin miqdarında 37%, kokain miqdarında 89%, ekstazidə 118%, kaptonda 134%, bonsaidə 144%, metamfetamində isə 515% artım var”.
Açıqlamada: “2016-cı ildən sonra hər il heroin, kokain, metamfetamin və ekstazi ilə bağlı həbs göstəricilərində respublika tarixi üzrə rekord qırılıb. Narkotiklə bağlı həbslərdən məmnun olmaq lazımdır. Çünki narkotik cinayətləri hüquq-mühafizə orqanlarının müdaxiləsi ilə aşkar edilə bilər”, ifadəsinə də yer verilib.
Yaxşı, narkotik həbslərindən məmnun olaq, lakin bu rəqəmlər Türkiyənin son 10 ildə tam bir narkotik bazarına çevrildiyini göstərir. Bu, respublika tarixində bir ilkdir. Cinayətlə mübarizə prosesi elə bataqlığı qurutmaqdır. Həbs sayının çox olması narkotik ticarətinin artıq bir sektora çevrildiyini göstərir. Bu ticarətin qarşısı alınarsa, sektordakılar da öz əməyi ilə dolanacaq, cinayət törətməyəcək və buna görə də tutulmayacaqlar. Vəziyyət həqiqətən qorxuncdur.
Bu vəziyyətdə Sedat Pekerin Kolumbiyadan Türkiyəyə göndəriləcək kokain dolu gəmilərlə bağlı iddiası olduqca vacibdir. Ələ keçirilən kokain miqdarı öz-özünə artmır. Bunları Türkiyə bazarına gətirənlər və göndərənlər var. Bəs bunlar tutulanların arasındadırmı? Kokain dolu gəmilər və ya gəmilərlə bağlı araşdırma aparılıbmı?
Qeyd: Narkotik sənayesi və çirkli pulların siyasətə təsir etdiyi iddiası bir televiziya kanalında müzakirə edilib. Bu çərçivədə, dünyadakı narkotik tıxacı və Türkiyəyə qalan payla əlaqədar 25 il əvvəl verdiyim rəqəmlər qismən dəyişdirilib və guya Susurluk hesabatında yazılmış kimi təqdim edilib. Ancaq Susurluk hesabatında və ya başqa bir mənbədə belə bir rəqəm yoxdur. Üstəlik, 25 il əvvəlki rəqəmlər artıq çox geridə qalıb. Suallar mövzu haqqında heç bir məlumatı olmayan insanlara yönəldilib. Onlar da, təbii olaraq, məlumatsız olduqlarını bildiriblər.
Arslan Bulut
“Yeniçağ” qəzeti, Türkiyə, 24 may 2021-ci il
Tərcümə PİA.az-ındır
