İntihara cəhd etdiyi deyilən qızın atası danışdı
Sulutəpə qəsəbəsində yerləşən 313 nömrəli məktəbdə intihara cəhd etdiyi deyilən qızın atası Adil Hacıyev hadisənin təsadüfən baş verdiyini deyib.
Oxu.az-a açıqlama verən A.Hacıyev deyib ki, qızının məktəbin üçüncü mərtəbəsindən özünü atması ilə bağlı səsləndirilən fikirlər yanlışdır:
“Məktəbə anasının yanına gəlib və yıxılıb. Ailə münaqişəsi zəminində baş verməsi iddiası da yalandır. Çox söz deyilə bilər. Əsas odur ki, qızım sağdır. Hələ xəstəxanada qalacaq. Həkimlər ayağında sınıq olduğunu deyirlər”.
Qeyd edək ki, məktəbin direktoru Zakir Bayramov 2006-cı il təvəllüdlü Hacıyeva Solmaz Adil qızının naməlum səbəblərdən özünü təhsil müəssisəsinin üçüncü mərtəbəsindən atdığını və şagirdlərin bunu gördüyünü demişdi.
***15:33
Sulutəpə qəsəbəsində yerləşən 313 nömrəli məktəbdə yıxılan qızın intihara cəhd etdiyi müəyyənləşib.
AzToday.az xəbər verir ki, bununla bağlı oxu.az-a məktəbin direktoru Zakir Bayramov məlumat verib.
O bildirib ki, 2006-cı il təvəllüdlü Hacıyeva Solmaz Adil qızı məktəbə texniki işçi kimi çalışan anası Hacıyeva İlhamənin yanına gəlib:
“Həmin günü qız kitab da götürməli idi. O, naməlum səbəbdən təhsil müəssisəsinin üçüncü mərtəbəsinə qalxıb, pəncərəni açaraq, özünü atıb. Bunu şagirdlərdən biri görüb və müəllimlərə xəbər verib. Dərhal təcili tibbi yardım çağırılıb və hüquq-mühafizə orqanlarına məlumat verilib. Anasının dediyinə görə, dünən qızı ilə aralarında mübahisə olub və onu danlayıb. Qızın qolunun iç və çöl hissəsində kəsiklər və cızıqlar var. Qızla birlikdə xəstəxanaya özüm də getdim və onun müayinəsində iştirak etdim. Həkimlərin dediyinə görə, onun sol ayağında sınıq və bel nahiyəsində əziklər var, həyati təhlükəsi yoxdur. İlkin ehtimala görə, hadisəyə ailədaxili münaqişə səbəb olub. Şagird nizam-intizamlı olub. Heç kimlə problemi olmayıb”.
Hüquq-mühafizə orqanları da intihara cəhd versiyasını istisna etmir.
