CəmiyyətGündəm

Vasif Talibovun məcburi iməcliklərinə etiraz: Bizi qul kimi ərazilərində işlədirlər

Naxçıvanda hər həftənin şənbə və bazar günləri dövlət idarə və müəssisələri işçiləri məcburi iməciliyə çıxarılır. Bu haqda “Gündəlik Naxçıvan”a yerli sakinlər məlumat verib. Onların bildirdiyinə görə, iməciliyə çıxmaq istəməyənlərin ya maaşı kəsilir, ya da onlar işdən çıxarılmaqla hədələnirlər. İməcilik günləri onlara əsasən yol kənarlarını süpütdrür, ting əkirdirir, alaq yoldururlar. Onlar mövsümə uyğun olaraq , məmurların əkin sahələrində də işlədilirlər.

Naxçıvan Ali Məclisinin rəsmi səhifəsində verilən məlumata görə, hər həftə 50 minə yaxın “könüllü” bu iməciliklərdə iştirak edir. Təmizlik işləri görmək üçün hər idarə və müəssisə üçün xüsusi ərazi təyin olunur. Hər kəs öz ərazisinə görə məsuliyyət daşıyır.
Həftə sonları məciliyə çıxarılanlar arasında təhsil və tibb işçiləri də var. Şərur rayon məktəblərinin birində müəllim işləyən Şahbaz Dadaşov deyir ki, iməcilik əlindən nə istirahət edə bilirlər, nə də normal dərs keçə:
” Harda görünüb ki, müəllim küçə süpürsün, alaq təmizləsin. Hər müəllim üçün küçənin bir hissəsini ayırıblar. Bu bizi alçaltmaqdı. Təsəvvür edin ki, küçə süpürəndə, dərs dediyim şagird yanımızdan keçir. Sabah dərsdə o bizə nə hörmət qoyacaq. Deyirsən iməciliyə çıxmaq istəmirəm, deyir ki, 20 manat ver, fəhlə tut, sənin yerinə işləsin. Əkilən tingləri də özümüz almalıyıq. Hər mövsüm 30-40 manat da tinglərə veririk. Tinglər böyüyür, bar verir, bizi yaxına da buraxmırlar. Meyvələrə uzaqdan baxa-baxa qalırıq. Hamısını yığıb, bizə baha qiymətə satırlar”.
Təhlükəsizlik baxımından adının çəkilməsini istəməyən, rayon xəstəxanasında işləyən həkimlərdən biri deyir ki, iməcilik ucbatından xəstələrə vaxtlı-vaxtında qulluq edə bilmirlər:

“Elə olur ki, iməcilik günləri xəstəxanada növbətçi həkim, tibb bacısı da qalmır. Xəstəxanaya təcili xəstə gətirilir, vaxtında müdaxilə edə bilmirik. Buna görə həyatını itirən xəstələr də olub. Hər xəstəxanaya xüsusi sahələr ayrılıb ki, iməciliyə ora aparırlar. Çox vaxt xəstələri iməcilik sahələrində – yol qırağında, ağac altında, hansısa məmurun əkin sahəsində müayinə edir, iynə vurub, sistem qoşuruq. Naxçıvanda çoxlu bağban, süpürgəçi ştatları var. Onların yerinə bizi işlədib, pul silirlər. Qısası bizi iməcilik adı altına qul kimi işlədirlər. Hər dəfə də bizə qul olduğumuzu xatırladırlar. Məcburi iməcilik keçirməyin bir məqsədi də budur ki, qul olduğumuzu unutmayaq”.

Sovet ənənsi olan iməcilik, Naxçıvanda 1990-cı illərin sonlarından, Vasif Talıbov hakimiyyətə gələndən sonra yenidən ənənə halına salınıb. Həmin vaxtdan fasiləsiz olaraq hər həftənin istirahət günləri iməciliklər keçirilir.

Mənbə: Gündəlik Naxçıvan

Bənzər yazılar

Back to top button