GündəmHadisəManşet

Zəngilanda “Ağıllı kənd” tikən işçilər ETİRAZA QALXDI – “3 aydır işləyirik, bir qəpik pul verməyiblər”

Onlar jurnalistlərə bildiriblər ki, “işçilər Zəngilanı tərk edirlər”

Zəngilanda “ağıllı kənd”in tikintisi üçün işə götürülən 300-dək işçi-inşaatçı əmək müqaviləsi, əməkhaqqı və normal məişət şəraitinin olmaması şikayətilə jurnalistlərə müraciət edib. İki aydır ki, maaş almırlar. Onlara maaşları kartlara köçürməyi vəd edirlər, lakin əmək müqavilələrinin olmaması səbəbindən bank kartları yoxdur.

Dekabrın 1-də işçilər şirkət rəhbərliyinə ərizə yazıblar. Onlara vəd ediblər ki, şikayətə baxılacaq. Səkkiz nəfər polisə 102 xidmətinə zəng edib, bundan sonra onlardan yazılı şikayətləri alıblar.

İşçilərdən biri deyir ki, sadalanan səbəblərdən inşaatçıların bir hissəsi iş yerlərini tərk edib, bu səbəbdən tikinti dayandırılıb.

Fəhlələr onları Zəngilana, işğalçılar tərəfindən dağıdılmış Üçüncü Ağalı kəndində işləməyə aparan tikinti şirkətinin adını açıqlamırlar. “Bizi gətirib buraya atdılar. Soyuqda yaşayırıq, elementar şərait yoxdur. Bu dövlətdə prezident var, ümid edirik ki, bizim problemlə məşğul olacaq”, – fəhlə deyib.

Əlavə edək ki, Zəngilanda “ağıllı kənd” in tikintisi üzrə işlər dövlət telekanallarında nümayiş etdirilir. Oktyabrın 20-də məlumat verilib ki, kəndin tikintisi başa çatmaq üzrədir. Ekologiya və Təbii Sərvətlər Nazirliyi TV-yə bildirib ki, 200 yaşayış evi və dörd sosial təyinatlı bina, demək olar ki, tikilib, ilin sonuna qədər süni göl də daxil olmaqla, ekoloji obyektlər istifadəyə veriləcək.

Kənd Təsərrüfatı Nazirliyində Turan-a bildiriblər ki, fəhlələri işə götürən və onlarla ödəniş üsulunu nizamlanmayan subpodrat təşkilatı günahkardır. Şirkət bank vasitəsilə pul ödəməyi təklif edib, lakin işçilər pulu nağd şəkildə tələb ediblər, çünki bankomat vasitəsilə almaqda çətinlik çəkirlər.

“Kənd Təsərrüfatı Nazirliyi inşaatçıların əməyinin ödənilməsində iştirak etmir. Biz, sadəcə, işləri ödəyən sifarişçiyik. Kənd Təsərrüfatı Nazirliyi bu məsələni araşdırıb, fəhlələrin problemi artıq həll olunub. Kənd Təsərrüfatı Nazirliyi ilə müqavilə bağlayan və subpodratçıları işə götürən baş podratçının adını açıqlaya bilmərəm”,- Kənd Təsərrüfatı Nazirliyinin mətbuat xidmətinin rəhbəri bildirib.

KİV-in məlumatına görə, “ağıllı kənd”in tikintisinin baş podratçısı AS Group Investment şirkəti təyin edilib.

Ancaq dünən şəbəkədə işçilərin şikayətilə bağlı video yayılıb, onlar bu günlərdə şikayət ediblər, yəni problemin bağlanması barədə danışmaq hələ tezdir.

İnşaatçıların narazılığını şərh edən hüquq müdafiəçisi Mirvari Qəhrəmanlı fəhlələrə Əmək və Əhalinin Sosial Müdafiəsi Nazirliyi yanında Əmək Müfəttişliyinə müraciət etməyi təklif edib. “Əgər faydası olmasa, qoy, məhkəməyə müraciət etsinlər”, – o deyib.

2021-ci ilin 6 ayı ərzində Zəngilan rayonunun Ağalı-2 kəndi ərazisində “Ağıllı kənd” layihəsinin reallaşdırılması üçün Kənd Təsərrüfatı Nazirliyinə 10,8 milyon manat ayrılıb.

Maliyyə Nazirliyinin məlumatına görə, 2021-ci ilin yanvar-iyun aylarında Azərbaycan hökuməti işğaldan azad edilmiş ərazilərin, o cümlədən Zəngilan rayonunun bərpası proqramı çərçivəsində 372,1 milyon manat xərcləyib.

İlk “Ağıllı kənd” layihəsinə dövlət başçısı tərəfindən 2021-ci ilin aprelində start verilib. Oktyabrın son ongünlüyündə Azərbaycan prezidenti İlham Əliyev Zəngilan rayonuna səfər edib və görülən işlərlə tanış olub. Kənd təsərrüfatı naziri İnam Kərimov bildirib ki, layihənin icrası çərçivəsində 110 hektardan çox ərazidə tikinti işləri aparılıb və yaxın gələcəkdə burada “ağıllı şəhər-bağ”ın necə olacağı barədə ətraflı məlumat verib.

Bir neçə azərbaycanlı memar jurnalistlərə müsahibəsində Zəngilanda “ağıllı kənd”i imperator Rusiyasında “Potyomkin kəndləri” (ölkə rəhbərliyini aldatmaq üçün saxtakarlıq) müqayisə edib.

Bənzər yazılar

Back to top button