Xaricdə torpaq götürüb buğda əkmək kimə sərf edir: Azərbaycana, ya məmurlara?

“Vahid Əhmədov kənd təsərrüfat sahəsi üzrə mütəxəssis deyil, iqtisadçıdır. Bu gün Azərbaycanın kifayət qədər torpaq resursu var. 680 min hektarda buğda əkilir və bizə 500 min hektar, yəni 680 min hektardan az sahə kifayətdir ki, özümüzün ərzaq buğdasına olan tələbatımızı yüz faiz ödəyə bilək. Bunu mən aqronom kimi deyirəm”.

Bu sözləri Qaynarinfo-ya açıqlamasında kənd təsərrüfatı üzrə ekspert Vahid Məhərrəmov Milli Məclisin deputatı Vahid Əhmədovun “Azərbaycan xarici ölkələrdən birinin ərazisini icarəyə götürür” fikirinə aydınlıq gətirərkən deyib. Ekspert hesab edir ki, bəzi məmurlar dövlət vəsaiti hesabına xarici ölkələrdə aqrobiznes qurmaq istəyirlər:

“Mən Rusiya da, Azərbaycanda da işləmişəm. Azərbaycanın iqlim şəraitinə bələdəm, bəzi aqrotexniki qaydalar, xüsusi tədbirlər var. Onlar həyata keçirilməlidir ki, məhsuldarlıq artsın. Bunların məqsədi nədir? Təxminən 7 il öncə bildirdilər ki, Azərbaycan yaxın illərdə ərzaq buğdasına olan ehtiyacını ödəyəcək. Əslində problem nə torpaqdadır, nə torpağın, nə də su ehtiyyatlarının azlığındadır. Problem sahəyə məsul şəxslərin qeyri-peşəkarlığındadır. Yəni, primitiv düşüncə ilə bu sahəni inkişaf etdirmək mümkün deyil. Ona görə ki, sahə olduqca mürəkkəbdir. Gedib hər hansı ölkənin ərazisində 2 milyon hektar torpaq sahəsini çox baha qiymətə icarəyə götürəcəklər. Dövlət büdcəsi hesabına digər resurslara ehtiyac yaranacaq. Dünyada buğdanın qiyməti bahalaşır və bahalaşmaqda davam edir. Bir qrup məmur daxildə torpaqları ələ keçirib. Onlar Azərbaycanda buğda istehsalını qaydaya sala bilmirlər. İndi dövlət büdcəsi hesabına digər ölkələrdə biznes qurmaq istəyirlər”.

Vahid Məhərrəmovun fikirincə, xaricdə qurulan biznes nəzarətdən kənarda qalacaq:

“Dövlət büdcəsindən buğda istehsalı adı ilə küllü miqdarda vəsait ayrılacaq. Texnika, texnoloji avadanlıqlar alacaqlar, subsidiya ödəyəcəklər. 20-dən çox fermer təsərrüfatı, 41 aqropark yaradıldı, hər birinin nəzdində 4-5 min hektar var, ümumilikdə 360 min hektar torpaq sahəsi ayrılıb. İşğal altında olan torpaqlar alınanda deyildi ki, ərzaq təlabatı ödəniləcək. Bəs nə baş verib?

Ola bilsin Milli Məclisdə qərar da qəbul olunacaq ki, büdcədən vəsait də ayrılsın, Rusiyada, yaxud da başqa ölkələrdə geniş torpaq sahələri icarəyə götürülsün. Kim alacaq onu? Kəndlilər? Kəndli gedib Rusiyada taxıl əkməyəcək, məmurlar alacaq. Hansı ki, həmin məmurlar bizneslərinin bir hissəsini xaricə keçiriblər. Onlardan soruşmaq lazımdır, buğda istehsal edə bimirsən, deyirsən, torpaq ərazimiz azdır, bəs kartof niyə istehsal edə bilmirsən? Niyə əkin əraziləri azalıb?”

Qeyd edək ki, Milli Məclisin deputatı Vahid Əhmədov mətbuata açıqlamasında “Bəzi dövlətlərdə əlavə torpaq ehtiyatları var. Biz həmin dövlətlərlə müqavilə bağlayaraq onlardan icarəyə torpaq götürüb və taxıl əkininə başlamaq istəyirik”, – deyə bildirib.