Bakıda Rusiya səfirliyi qarşısında Ukrayna vətəndaşının müharibəyə qarşı aksiyası (VİDEO)

Azərbaycan sakini, Ukrayna vətəndaşı Yelena Əziz bu gün RF səfirliyi qarşısında təkbaşına etiraz aksiyası keçirib.

Ukrayna bayrağına bürünən qadın üzərində qan ləkələri və Rusiyanın Ukraynaya hücumunun qurbanlarının fotoşəkilləri fonunda “Sizin olduğunuz yerdə qan var” şüarı yazılan plakat qaldırıb.

Qadın “Rusiya təcavüzkardır!”, “Rusiya işğalçı ölkədir!”, “Putin işğalçıdır!” və s. şüarlar səsləndirib.

Polis əməkdaşları qadının əlindən plakatı alıblar və onu səfirlik binasından uzaqlaşdırıblar.

Qadın jurnalistlərin kameraları qarşısında çıxış etməyə davam edib: “Mən bir Ukrayna vətəndaşı olaraq Rusiya təcavüzünə qarşıyam. 1990-ci il Qanlı Yanvar hadisələri, Xocalı faciəsi və Ukraynaya qarşı təcavüz – bunlar hamısı Rusiyanın əməlidir. “Yaşasın Ukrayna, Yaşasın qəhrəmanlar, Düşmənlərə ölüm!”.

Bundan sonra polis əməkdaşları onu saxlayıblar və Nəsimi RPİ-nin 20 saylı polis şöbəsinə aparıblar.