Ərdoğanın ağ yalanları və biətçilərin göz yaşları
Türkiyə prezidenti Rəcəb Tayyip Ərdoğan 2011-ci ildə “’Türkiyə Hazır, Hədəf 2023” deyərək, 2023-cü ildə Türkiyənin dünyanın ən böyük iqtisadiyyata malik 10 ölkənin sırasına daxil edəcəklərini bəyan etmişdi. Ərdoğanın göstərdiyi tarixin, 2023-cü ilin astanasındayıq və artıq Türkiyə 1977-ci ildən bu günə kimi ilk dəfə dünyanın 20 ən böyük iqtisadiyyata sahib ölkələrin siyahısından atılıb. Artıq Türkiyə dünay birliyinin müstəqil dövlət kimi tanımadığı Tayvanla ünyanın 21-ci ən böyük iqtisadiyyata malik ölkəsi adı uğrunda yarışmaq məcburiyyətində qalıb. Dünya Falyuta Fondunun hesablamalarına görə bu ilin sonunda Tayvanla bu rəqabəti də uduzaraq 22-ci yerə düşəcək.
Ərdoğan isə bir neçə gün öncə rəhbərlik etdiyi partiyanın rayon təşkilatlarının sədrlərinin 151-ci genişləndirilmiş toplantısındakı çıxışında “Çox daha böyük bir sıçrayışa girdik, Türkiyəni dünyanın 10 ən böyük iqtisadiyyatından biri edəcək addımlar atırıq” deyib. Ancaq bu dəfə hədəfə çatacaqları tarixi 2023-cü il deyil, 2053-cü il olaraq göstərib. Ərdoğanın bu çıxışı salonda oturan və televiziya biətçilərin gözlərini yaşardıb.
Bu gün dünyanın 10-cu ən ən böyük iqtisadiyyatına malik ölkə Cənubi Koreyadır. Cənubi Koreyanın milli gəliri 1 trilyon 824 milyard dollar, Türkiyənin milli gəliri 796 milyard dollardır. Rəqəmlərdən göründüyü kimi Cənubi Koreyanın milli gəliri Türkiyədən iki dəfə çoxdur. Türkiyənin 2053-cü ildə dünyanın 10 ən böyük iqtisadiyyatından biri olması fantastik xəyalarda belə mümkün olmasa da, düşünmək qabiliyyətini itirmişləri rəqəmlərin acı gerçəkliyi də dəyişmək gücündə deyil.
Xaqani Cəfərli, politoloq