Ali Hərbi Məktəbin rəis müavini cərimələnib – Qurbanəli İsmayılov nədə ittiham olunub?
Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti Heydər Əliyev adına Azərbaycan Ali Hərbi Məktəbin rəis müavini polkovnik-leytenant Qurbanəli İsmayılovu cərimələyib.
Qaynarinfo-ya daxil olan məlumata görə, Qurbanəli İsmayılova İnzibati Xətalar Məcəlləsinin 192.1-ci maddəsi ilə cərimə yazılıb.
Bu maddə Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsi ilə bağlıdır.
Maddədə inzibati cəza növü kimi fiziki şəxslər 1000 manatdan 2000 manatadək, vəzifəli şəxslər 3000 manatdan 5000 manatadək, hüquqi şəxslər 20 000 manatdan 25 000 manatadək məbləğdə cərimə edilir.
Qurbanəli İsmayılov dövlət qurumunun qərarında məhkəməyə şikayət təqdim edib. Onun şikayətinə Binəqədi Rayon Məhkəməsində baxılacaq. Aygün Qurbanova iş üzrə hakim təyin edilib.
