Gömrük ərazisində olan yük maşınlarından park üçün ödəniş tələb olunurmu?

Print Friendly, PDF & Email

“İyunun 29-da bəzi kütləvi informasiya vasitələrində və sosial şəbəkələrdə gömrük-sərhəd keçid məntəqələrindən birində ölkənin gömrük ərazisinə daxil olan yük nəqliyyat vasitələrindən park üçün odəniş adı altında qeyri-qanuni vəsait tələb olunması barədə əsassız məlumatlar və təxribat xarakterli video çəkiliş yayılıb.

Dövlət Gömrük Komitəsi bildirir ki, gömrük-keçid məntəqəsində qeyri-qanuni ödənişlərin tələb olunması ilə bağlı həmin video çəkilişdə irəli sürülən iddialar tam əsassızdır. Belə ki, mövcud gömrük qanunvericiliyinə əsasən idxal-ixrac əməliyyatları zamanı yük daşıyan avtonəqliyyat vasitələri gömrük rəsmiləşdirilməsi başa çatana qədər gömrük nəzarəti altında yerləşən xüsusi ayrılmış dayanacaqdan istifadə etdikləri üçün ƏDV ilə birlikdə 20 AZN ödəməlidir”

APA-nın xəbərinə görə, bu barədə Dövlət Gömrük Komitəsi mətbuat xidmətinin məlumatında deyilir.

Məlumatda bildirilir ki, videonu qeydə alan dartıcısının dövlət nömrə nişanı 90 ZE 278, qoşqusunun nömrəsi 99 ZB 978 olan yük nəqliyyat vasitəsinin sürücüsü Ağayev Yaşar Nizami oğlunun avtomobillərin gömrük-sərhəd keçid məntəqəsində uzun müddət, hətta 24 saatdan artıq yubadılması ilə bağlı irəli sürdüyü iddialar tamamilə əsassızdır: “Belə ki, Komitənin Vahid Avtomatlaşdırılmış İdarəetmə Sistemi vasitəsilə aparılan araşdırma zamanı videotəsvirlərdə dövlət nömrə nişanı aydın görünən dartıcısının nömrəsi 53 BB 344, qoşqusunun nömrəsi 53 BB 281 olan nəqliyyat vasitəsi 26 iyun tarixdə, saat 09:29:33-də gömrük postunun ərazisinə daxil olaraq 10:41:13-də, dartıcısının nömrəsi 34 SU 0178, qoşqusunun nömrəsi 34 KL 3454 olan nəqliyyat vasitəsi saat 09:14:52-də gömrük postunun ərazisinə daxil olaraq 11:08:53-də, dartıcısının nömrəsi 53 AB 027, qoşqusunun nömrəsi 53 AB 028 olan nəqliyyat vasitəsi saat 09:24:53-də gömrük postunun ərazisinə daxil olaraq 10:35:33-də, dartıcısının nömrəsi 34 JC 8846, qoşqusunun nömrəsi 34 KL 3452 olan nəqliyyat vasitəsi saat 09:20:52-də gömrük postunun ərazisinə daxil olaraq 10:53:46-da gömrük postunu tərk edib. Araşdırmanın nəticəsi göstərir ki, həmin avtonəqliyyat vasitəsinin sərhədkeçmə prosesinə sərf olunan vaxt müasir qanunvericiliyə və beynəlxalq təcrübədə tətbiq edilən qaydalara tam uyğundur.

Videonu qeydə alan şəxs isə həmin gün saat 03:04:00-da gömrük postunun ərazisinə daxil olaraq 09:31:12-də ərazini tərk edib. Onun digər nəqliyyat vasitələri ilə müqayisədə gömrük postunun ərazisində daha çox qalmasının səbəbi isə idxal- ixrac əməliyyatları zamanı yük daşıyan avtonəqliyyat vasitələrinin gömrük rəsmiləşdirilməsi başa çatana qədər gömrük nəzarəti altında yerləşən xüsusi ayrılmış dayanacaqdan istifadəyə görə tələb olunan vəsaiti ödəməkdən imtina etməsi, gömrükçülərin haqlı tələblərinə tabe olmamasıdır.

Üstəlik həmin şəxs qanunvericiliyin tələblərini pozaraq postun ərazisində videoçəkiliş aparır, öz hərəkətləri, sözlü ifadələri ilə digər şəxsləri də qanundankənar əməllərə sövq edir, ölkənin iqtisadi təhlükəsizliyinin keşiyində duran strateji qurumlarından birinin işguzar imicinə xələl gətirməyə çalışır.

Dövlət Gömrük Komitəsi bir daha hər kəsi, komitənin və onun əməkdaşlarının fəaliyyəti ilə bağlı məlumatlar yayarkən diqqətli olmağa, qanunvericiliyin tələblərinə əməl etməyə çağırır”.