Millimizin sabiq üzvü Gürcüstan klubundan qovuldu

Print Friendly, PDF & Email

Badri Kvaratsxeliya Gürcüstanın “Samtredia” klubunun baş məşqçisi postundan kənarlaşdırılıb.

Fanat.Az xəbər verir ki, buna səbəb komandanın uğursuz çıxışı olub. Ölkə çempionatının XVII turunda “Rustavi”yə 1:2 hesablı məğlubiyyətdən sonra rəhbərlik 53 yaşlı mütəxəssisi istefaya göndərib. Aktivində 9 xal olan “Samtredia” turnir cədvəlinin soununcu – 10-cu pilləsində qərarlaşıb.

Qeyd edək, “Samtredia” Avropa Liqasının I təsnifat mərhələsində rəqib Qazaxıstanın “Tobol” klubu ilə qarşılaşacaq. Oyuna 8 gün qalmış komanda baş məşqçisiz qalıb.

Onu da qeyd edək ki, Badri Kvaratsxeliya futbolçu karyerası ərzində “Şəmkir” və “Kəpəz” komandalarında çıxış edib. O, 1999-2000 mösümündə “Şəmkir”in heyətində 16 qolla Azərbaycan çempionatının bombardiri olub. Kvaratsxeliya həmçinin 3 dəfə Azərbaycan millisinin formasını geyinib, 2008-2009 mövsümündə “Standard” (Bakı) komandasının baş məşqçisi, 2012-2013 mövsümündə isə “Qəbələ”nin məşqçisi kimi çalışıb.