Palçıqdakı donuzun xoşbəxtliyi
Şərq təqvimi, qərb təqvimi, fərq etməz, gələcəkdən xəbər tutmaq həvəsi buna bənzər şeylərin yaranmasıyla sonuclanıb. Yeni ilin hansı simgə üzərində təhvil verilməsi isə həmişə adamı maraqlandırır.
Ümid əlacsızların əbədi silahdaşıdı. Dərdinə əlac tapılmayan Azərbaycan futbolunun da yeni-yeni ümidlərə ehtiyacı var. Görəsən, “İt ili”ni suyu süzülə-süzülə yola salan futbol ictimaiyyəti “donuz”dan – “qaban”dan nə umur? Baxdığını görə bilənlərsayağı baxışdan keçirək, ipucları tapaq.
AFFA-nın baş katibi Elxan Məmmədovun milli komandalardakı radikal məşqçi dəyişiklikləri – çirkin “süpürgə əməliyyatı” “qırmızı köpəy”i utandırdı. 2019-cu ildə ölkə futbolunun xərçəng xəstəliyi sayılan “vəzir”in çevrilişi bəhrə verməyəcək. “Almanlaşma” siyasəti fiaskoya uğrayan qurumun rəhbərliyi özündən yuxarıdakıları əsassız vədlərlə aldadıb və bu idman növünün inkişafını növbəti dəfə ləngidib.
Artıq Məmmədov və qulbeçələrini səriştəsiz təyini ilə qamçılamaq da olmaz. Bu, planlaşdırılmış, varlığıyla yoxluğu bilnməyən futbol veteranlarının dəstəyi ilə həyata keçirilmiş mənəvi cinayətdi. Həlledici fiqur “çəki”sini itirəcəyindən qorxan adamın repressiyasıdı. Yox, Qurban Qurbanovun və bacarığına güvənib aşağı yaş qrupları üzrə millilərə məsləhət gördüklərinin repressiya qurbanları olduğunu düşünmürəm. Kimlərinsə şəxsi mənafeyi üzündən Sibirə sürgünə göndərilən, sinəsi dəlik-deşik edilən, hələ də ayaqlarını yerə basmağa özündə taqət tapmayan balaca, şikəst körpə – futbolumuz oldu. Elxan bəyin AÇ-2020 sərsəmləmələrinə özündən və ətrafındakılardan başqa kimisə inandırmaq çətin məsələdi. Nə yazıq ki, “yuxarılar” inandılar… “Qaban”ı yola salaq, 2020-ci ildə, “Siçan ili”ndə gizlənməyə siçan dəliyi axtaranları görəcəyik.
Ağ-qara arzular “at”a minsəydi, başqa məsələ… “Donuz”a ümid azdı. Bir halda ki, Qurban bəy “köhlən atlar”a ayırmağa daha çox vaxt tapacaq, deməli, lap azdı. Hə, “Neftçi”ni deyirəm. Bakı təmsilçisi yaxşı başladı, ili də turnir cədvəlinin zirvəsində tamamladı. Ancaq “xalq komandası”nın xalqın komandasıyla mübarizə aparmağa, “taxtda qalmağa” böyük ehtimalla gücü çatmayacaq. Niyəsi haqda hamıya bəlli həqiqətləri yazmağa belə dəyməz. Görünən kəndə nə bələdçi…
Qol-budaq atmış ağacı yıxmaq asan deyil. Böyük nüfuz sahibini səssiz-səmirsiz aradan götürmək də həmçinin. “Futbol qəbiristanlığında gömülən adlar”ı xatırlasaq, bəs edər. Təəssüf ki, 21-ci əsrdə yaradılan çoxsaylılar arasında ən yaxşı böyüyənlərdən birini də zaval vurub. Birvaxtlar başqalarından “oyunçu qoparmasıyla” ad çıxaran “Qəbələ” yavaş-yavaş gedir. Öncə klub tarixinin ən uğurlu baş məşqçisi getdi, sonra ödənişli legionerləri, ardından da Təmkin Xəlilzadənin timsalında ayağı top tutan yerliləri… Şər deməsən, xeyir gəlməz. Bəlkə də bir qədər dərindən getdim. Amma bu qoxu, bu avaz yaman tanışdı.
Frits Stuxlikin rəhbərlik etdiyi Hakimlər və Hakim-İnspektorlar Komitəsini yad etmədən ilin ilk yazısını bitirmək ədalətsizlik olar. Sabiq Hakimlər Komitəsinin sədri Xaqani Məmmədovla Hakim-İnspektorlar Komitəsinin keçmiş sədri Gülağa Cabbarovun ikisinin bildiyi Stuxlikin qafasındakından azdı? “Hə” cavabı verənlərlə razılaşanları qınamıram. Hərənin öz fikri var. Lakin rüşvət aldıqlarına görə dəfələrlə rüsvay olanların avstriyalının böyür-başına şam kimi düzülməsi rəzalətdi. İnkişafa kim nail olacaq? Elçin Məmmədov? Futzal üzrə kurator pərdəsi altında təyinatlara “barmaq edən” adam – AFFA-nın boz kardinalı öz işində, öz imicindədi. Başqa adları da sadalaya bilərəm. Amma Məmmədov varsa, hamısı kölgədə qalır. Tələsməyin, tezliklə donuz xortultusu fit səsinə qarışacaq…
Papağınızı fırladın, “donuz” da 12 illik “istirahətə çəkiləcək”. Gələn il bu vaxt birillik zaman kəsiyində nəyin dəyişdiyini aydınlaşdırmaq istəyənlər geridə bir yığın neftli palçıq, palçığın ortasında da burnunda ölkə futbolunun rəmzi topunu fırladan donuzdan başqa nəsə sezməyəcək. Partlayana qədər yemiş, löhməyə ağnamış donuz xoşbəxt-xoşbəxt xortuldayacaq. Təbii, o an o donuzdan daha xoşbəxt kimsə tapılmayacaq. Gözlərinizi bərk-bərk yumun, mənzərəni canlandırmağa çalışın. Bu, sonu əvvəldən görünən başlanğıcın rəsmidi.
