Koronavirus ictimai nəqliyyat sektorunda hansı problemləri üzə çıxardı?
Koronavirus pandemiyasının ölkə ərazisində geniş yayılmasının qarşısını almaq məqsədilə karantin rejimi tətbiq olundu. İctimai nəqliyyatda da bir sıra məhdudiyyətlər tətbiq olundu. Metropolitenin fəaliyyətinin müvəqqəti olaraq dayandırılması, ekspress marşrut xətlərinin işə salınması, ictimai nəqliyyatda sosial məsafə qaydalarının tətbiqi və s. tədbirləri buna misal göstərə bilərik.
Bəs koronavirus Bakının ictimai nəqliyyat sektoru ilə bağlı diqqətdən qaçan hansı problemləri üzə çıxardı? Karantin dövründə əldə etdiyimiz hansı təcrübələrdən postkoronavirus dövründə də istifadə etməliyik?
Məsələ ilə bağlı ANN.Az-a açıqlama verən nəqliyyat üzrə ekspert Rauf Ağamirzəyev bildirdi ki, karantin dövründə Bakının ictimai nəqliyyatında ciddi alternativlərə ehtiyac olduğu ortaya çıxdı:
“Bir nəqliyyat vasitəsinin bağlanması digərinin həddən artıq yüklənməsinə səbəb olur. Sərnişin sayının az olduğunu nəzərə alaraq avtobusların həmin sərnişinləri daşıya biləcəyini düşünsək də, koronavirus dövrünün sosial məsafə qaydaları bu sayı məhdudlaşdırmağa məcbur edir. Karantin rejiminin bitdiyi və normal həyata geri dönüldüyü bir vaxtda metro və avtobusların yükünü azaldacaq yerüstü nəqliyyat şəbəkəsinin qurulması əhəmiyyətli olar. Yüngül relsli dəmiryolu sisteminə keçid həyata keçirilməlidir. Çünki hər hansı bir fors-major vəziyyətlər, bununla bağlı olaraq metronun bağlanması bir sıra ciddi fəsadlara yol açır. Biz gələcəkdə belə böhranlarla yenidən qarşılaşmayacağımıza dair sığortalanmamışıq. Bu hadisələr bizi gələcəyə daha hazırlıqlı olmağa vadar etməlidir”.
Ekspert əlavə edib ki, postkoronavirus dövrünün təcrübələrinə gəldikdə isə Bakı Nəqliyyat Agentliyinin (BNA) təklif etdiyi və hal-hazırda fəaliyyət göstərən ekspress avtobusların istifadəsini davam etdirmək olar. Həmçinin geniş küçələrdə avtobus zolaqlarını yaratmaqla və zolaqlardan istifadəyə ciddi nəzarət etməklə nəqliyyatdakı boşluqları doldurmaq mümkündür:
“Xüsusi zolaqların ayrılması avtobusların intensiv hərəkətinə və insanların mobilliyinə birbaşa təsir edəcək. Avtobus marşrutlarına ayrılmış xüsusi zolağın olması onların tıxacda qalmasını mümkünsüz edərək insanların prioritetinin dəyişməsinə səbəb olacaq. Həmçinin nəzərə almalıyıq ki, karantin dövründə də avtomobillərin yoxlanılması ilə bağlı qurulan postlar avtobusların nəqliyyat sıxlığında gecikməsinə və xüsusi zolaq probleminin aktuallaşmasına səbəb oldu”.
“Yaxşı olar ki, biz postkoronavirus dövrünə iş saatlarının başlaması və bitməsi ilə bağlı fərqli saatlı, “sürüşkən” qrafikləri tətbiq edək. Bu da eyni anda sıxlığın yaranmasının qarşısını alar”, – deyə ekspert vurğulayıb.
