İqtisadiyyatManşetÖnə çıxanlar

“Sovetski”dəki söküntünün milyonçuya çevirdiyi məmurların adları bilindi – ləqəbi “çəpiş”

Bakının “Sovetski” kimi tanınan məhəlləsində 2014-cü ildən etibarən başlanan köçürmə işlərinin artıq ikinci mərhələsi də gerçəkləşdirilir.

AzEuroNews.com xəbər verir ki, 2018-ci ilin fevralından “Sovetski”də növbəti köçürülmə prosesi haqda qərar verilib. Qərara görə 2 min evin köçürülməsi gerçəkləşdirilməlidir. Köçürmə və söküntü işləri Yasamal Rayon İcra Hakimiyyətinə tapşırılsa da, faktiki olaraq bütün işlər Maliyyə Nazirliyi Dövlət Maliyyə Nəzarəti Xidmətinin rəisi Cavanşir Yusifov tərəfindən həyata keçirilir. “Sovetski” söküləndən Cavanşir Yusifovun, onun ətrafında olanların yaşayış tərzi də dəyişib. Varlanıblar, imkanları o qədər genişlənib ki, daha əvvəllər olduğu kimi yaşamırlar. Sovetski söküldükcə Cavanşir Yusifovun ətrafındakıların villalarının, imarətlərinin, dəbdəbəli şəhərətrafı bağ evlərinin sayı da, maxinasiyalar da artmaqda davam edir.

İlham Bağırov “Sovetski”də qiymətləndirmə işləri tapşırılan, indiki adı “BTİ Expert”, əvvəlki adı “Azər Expert” olan MMC-nin rəhbəridir. Qardaşı Zahid Bağırov isə rəsmi işçi deyil. Amma onu – Zahid Bağırovu “Sovetski “də tanımayan az adam olar. Çünki baş çəkmədiyi ev, tin, küçə qalmayıb. Sakinlər öz aralarında onu “çəpiş” ləqəbi ilə çağırırlar. Bu da səbəbsiz deyil. Çünki Zahid Bağırov özbaşına sakinlərin evlərinin damına çıxır, ev sahiblərinin etirazlarına məhəl qoymur.

Elə Sovetskidəki sövdələşmələrin, dövlətin büdcəsindən pul silinmələrinin bir çoxu da onun üzərindən gerçəkləşdirilir. Sxem isə çox sadədir. Zahid Bağırov salamsız-kəlamsız evi söküləcək sakinin həyətinə girir. Əlindəki ölçü aparatı ilə ərazini çəkməyə başlayır. Qulağı səsdə olan sakin həyətdə ora-bura qaçan şəxsin kimliyini təxmin edir. Bilir ki, bu həmin o Zahiddir, damlarda gəzən həmin o “çəpiş”dir…

Sakin ani olaraq Zahid Bağırovu görəcək sevincək olur. Düşünür ki, həyəti söküləcək və həyatı dəyişəcək. Ona nəzərdə tutulduğu kimi hər kvadrata görə 1500 manatdan pul ödəniləcək, gedib həyatını quracaq.

Zahid Bağırovla söhbətdən sonra isə həmin sakinin sağlığında ciddi problemlər yaşanır, sanki quyunun dibinə düşür. Çünki Zahid Bağırov ona evinə görə hər kvadrat metrə görə 200 manat veriləcəyini deyir. Eyni zamanda söz atır ki, istəsə, məsələnin həlli yolunu da bilir, bəs evinin hər kvadratına görə 1500 manatdan pul ala bilər. Əli hər yerdən üzülən sakinin isə bahalı ətir iyi verən, özünü “Həsən ağanın qohumu” kimi aparan Zahid Bağırovun ədalı təklifi ilə razılaşmaqdan başqa yolu qalmır. Beləcə Bağırov qardaşlarını gizli milyonçuya çevirən sxem işə düşür.

Əvvəllər cırıq ayaqqabıda gəzən Zahid Bağırovun indi köməkçisi də var. İlham GiyasovBağırovların sxemində yer alan elementlərdən biridir. Bu gün o sökülən Sovetski küçələrində 10 min manat dəyərində olan az90-CB-056 nişanlı “Nissan-Tida” da gəzir. İşi-gücü evləri söküləcək sakinlərə büdcədə pulun qurtarmasını təlqin etməkdir. Bəs büdcədə pul qurtarır, Bağırovların şərtlərini qəbul edin, yoxsa evlərimizə görə pul ala bilməyəcəksiz.

Sakin Bağırovların şərtlərini qəbul etdikdən sonra onun evinin sənədləri, sxemləri, eskizləri dəyişdirilir, kvadratlar maksimuma qədər şişirdilir, sənədlərdəki əvvəlcədən Bağırovların özləri tərəfindən yazılan qondarma “yeni tikili” sözləri yoxa çıxarılır.

Sakinlərdə belə təəssurat yaradılır ki, evin kvadratı onların – yəni Bağırovların səyi nətəcəsində Nazirlər Kabinetinin 51 nömrəli, 16 fevral 2018-ci il tarixli qərarında göstərildiyi kimi 1500 manatlıq duruma gətirilir. Buna görə də Zahid Bağırov, onu əraziyə yollayan qardaşı İlham Bağırov və digərilərinin varlanmasına yol açılır. Bu cür sövdələşmədən əldə olunan gəlirin 60 faizi Bağırovlara, 40 faizi isə sövdələşməyə getmək məcburiyyətində qalan vətəndaşa verilir. İtirən vətəndaşlar, dövlət büdcəsi, qazananlar isə Bağırov qardaşları və onları qabağa verənlərdir.

“Sovetski” ərazisindən köçürmənin birinci mərhələsi 2017-ci ilin avqustunda başa çatıb. Bu prosesdə 4 min 300 ailə ərazidən çıxarılıb. Bəzi ailələr verilən kompensasiyanın məbləğinə etiraz edərək dirəniş göstəriblər. Həmin ərazidə hər kvadrat metrə görə sakinlərə 1500 manat ödəniləcəyi də dəfələrlə hakimiyyət nümayəndələri tərəfindən bəyan olunub. Ötən il boşaldılan 26 hektarlıq park və yaşıllıq salınması nəzərdə tutulur.

Bənzər yazılar

Back to top button