Azərbaycan vətəndaşı 102 günə bir tuman geyinməlidir – İqtisadçı hakimiyyəti sərt tənqid etdi
2023-ci ildə yaşayış minimumunu 246 manat götürmək nəzərdə tutulur. Əmək qabiliyyətli əhali üçün 261 manat, pensiyaçılar üçün 199 manat, uşaqlar üçün 220 manat müəyyən edilən yaşayış minimumu minimum istehlak səbətinə əsaslanır. Səbətə ərzaq məhsulları, qeyri-ərzaq malları, xidmətlər daxildir.
İqtisadçı, müxalif Respublikaçı Alternativ Partiyasının funksioneri Natiq Cəfərli yazır ki, Nazirlər Kabinetinin 6 iyun 2014-cü il qərarı ilə təsdiqlənən minimum istehlak səbəti tragikomediya təsiri bağışlayır: “Əmək qabiliyyətli şəxslər üçün istehlak səbətində bu normalar qəbul edilib: çörək və çörək məhsulları – ilə 136 kiloqram 800 qram (günə 375 qram); kartof – ilə 54 kiloqram 800 qram (günə 150 qram); ət və ət məhsulları – ilə 32 kiloqram 900 qram (yəni günə 90 qram); kərə yağı – ilə 7 kiloqram (günə 19 qram); balıq və balıq məhsulları – ilə 7 kiloqram 700 qram (günə 21 qram); bitki yağı, marqarin və digər piylər – ilə 10 kiloqram 900 qram (günə 29 qram).
Bu normalarla əmək qabiliyyətli insan dolana, normal qidalana bilərmi?
Gələk qeyri-ərzaq məhsullarına: palto tipli üst geyimləri qrupu – 8 ilə 3 dəst (2,5 ilə 1 dəst); alt geyimləri – 2,5 ilə 9 dəst (102 günə 1 dəst); corab məmulatları – 1,5 ilə 7 cüt (78 günə 1 cüt); ayaqqabı – 3,5 ilə 6 cüt (213 günə 1 cüt).
İnternetdən istifadə haqqı 1 ailə üçün gündə 1 saat götürülməklə müəyyənləşdirilir.
Belə meyarlar qoyub istehlak səbəti hesablayır, sonra da yaşayış minimumunu 246 manat müəyyən edirlər. Niyə belə aşağı? Məmləkətdə statistika siyasi ritorikaya xidmət edir, əgər yuxarı rəqəm, yəni normal hesablamalar aparsalar, o zaman ölkədə yoxsulluq həddində yaşayanların sayı kəskin arta bilər, rəsmi rəqəmlərdə bu say əhalinin 5 faizindən də aşağıdır.
Eksperiment üçün istənilən məmura bir aya 246 manat pul verək, günün 24 saatını da canlı izləmək şansı yaradaq, əminəm ki, ən baxımlı şou-proqram olar”.
