Azərbaycan Demokratiya və Rifah Hərəkatının sədri Qubad İbadoğlu həyat yoldaşı İradə Bayramova ilə birlikdə saxlanılıb.
Bu barədə Q. İbadoğlunun qızı Jalə Bayramova Abzas Media-ya məlumat verib.
O bildirib ki, valideynləri bu gün saat 3-də ADR-in Sumqayıt şəhərində keçiriləcək gənclərlə görüşü üçün yola düşüblər.
“16:40-da vəkil Zibeydə Sadıqovaya zəng ediblər ki, atam “Bandotdel”ə gətirilib və müdafiəsi üçün ora getməlidir. Hal-hazırda atam və anam “Bandotdel”dədir. Polislər atamdan ofisin açarını alıb orada axtarış aparmağa gedirlər” – Jalə Bayramova bildirib.
ADR Hərəkatının İdarə Heyətinin üzvü Ellada Məmmədli isə bildirib ki, ofisdə axtarış aparılması ilə bağlı məhkəmə qərarının olub-olmadığından xəbərsizdir.
“Qubad bəyin qardaşı Qalib Toğrul ofisə yollanır. Ona polisdən zəng ediblər ki, ofisin açarın gətirsin, axtarış aparacaqlar”, – E. Məmmədli bildirib.
Xatırladaq ki, DİN mətbuat xidməti məsələ ilə bağlı açıqlama yayıb.
Bildirilib ki, Qubad İbadoğlu daxil olmuş müraciətlə əlaqədar vəkili Zibeydə Sadıqova ilə birgə DİN-in Baş Mütəşəkkil Cinayətkarlıqla Mübarizə İdarəsinə dəvət edilib. Qeyd olunub ki, araşdırma aparılır, nəticələrlə bağlı əlavə məlumat veriləcək.
Qeyd edək ki, Azərbaycan Demokratiya və Rifah Partiyası 2015-ci ildə yaradılıb. Ədliyyə Nazirliyi dörd dəfə ADR Partiyasının dövlət qeydiyyatına alınmaq üçün təqdim etdiyi sənədləri çatışmazlıqlar səbəbi ilə geri qaytarıb.
Azərbaycanda “Siyasi partiyalar haqqında” qanunun qüvvəyə minməsindən bir gün sonra – 2023-cü ilin 12 yanvarında Q. İbadoğlu açıqlama yayaraq partiyanı buraxdığını açıqlayıb. Bundan sonra partiyanın böyük ehtimalla hərəkat kimi işini davam etdirəcəyini bildirib.