Qarabağ Dirçəliş Fondu 2 tədbir üçün 132 min xərcləyəcək
Qarabağ Dirçəliş Fondu “Setline” MMC (VÖEN – 1303390191) ilə satınalma müqaviləsi imzalayıb.
Yeniavaz.com xəbər verir ki, “Setline” MMC Qarabağ Dirçəliş Fondunun sifarişi əsasında “Küləyə qalib gəl” şüarı altında keçirilən “Bakı Marafonu – 2024” və “Qarabağın rəngləri” xeyriyyə qala gecəsi tədbirlərinin təşkili xidmətlərini həyata keçirəcək.
Qeyd edək ki, bu tədbirlərdə biri – “Küləyə qalib gəl” şüarı altında keçirilən “Bakı Marafonu – 2024” artıq başa çatıb. Digər tədbirin isə yaxın günlərdə təşkil olunacağı gözlənilir.
Hər iki tədbirin təşkili üçün Qarabağ Dirçəliş Fondu “Setline” MMC-yə 131 min 637 manat 14 qəpik ödəyəcək.
Məlumat üçün bildirək ki, Qarabağ Dirçəliş Fondu tender müsabiqısi keçirmədən “Setline” MMC ilə bir mənbədən satınalama metodu əsasında müqavilə imzalyıb. Eyni zamanda satınalma dövlət satınalmaları vahid internet portalından kənar keçirilib.
Xatırladaq ki, “Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsilə həyata keçirilir.
Onu da bildirək ki, daha əvvəl Qarabağ Dirçəliş Fondu tərəfindən “Qarabağın Dirçəlişi: Faciədən Zəfərə” adlı kitabın yazılması üçün “Media Prima Advertising” şirkətinə 1 milyon 178 min 672 manat vəsait ayrılması sosial şəbəkələrdə geniş müzakirələrə səbəb olub.
