İsrail HƏMAS komandirlərinin öldürülməsi üçün xüsusi əməliyyatların keçirilməsi üçün mərkəz yaradıb

İsrailin “The Times of Israel” nəşri xəbər verir ki, İsrailin Baş Təhlükəsizlik Xidməti və İsrailin kəşfiyyat xidməti “Mossad” Fələstin HƏMAS hərəkatının döyüşçülərinin və komandirlərinin öldürülməsinin planlaşdırılması üçün xüsusi əməliyyat mərkəzi yaradıb.

Nəşrin İsrail kəşfiyyat xidmətlərindəki həmsöhbətinin sözlərinə görə, yeni struktur oktyabrın 7-də İsrail ərazisinə hücumda bilavasitə iştirak edən Həmas nümayəndələrinə qarşı əməliyyatların müəyyənləşdirilməsi və planlaşdırılması ilə məşğul olacaq.

“The Times of Israel”in qeyd etdiyi kimi, yeni komanda mərkəzi artıq işə başlayıb. Bunun İsrail Müdafiə Qüvvələrinin Qəzza zolağında quru əməliyyatına başlamasından sonra intensivləşəcəyi gözlənilir. Mərkəzin işi çərçivəsində İsrail kəşfiyyat xidmətləri HƏMAS-ın “yüzlərlə” nümayəndəsinin harada olduğu barədə məlumatları tapmağı planlaşdırır.(Turan)